تجربتي مع Kindle

كنت في ألمانيا قبل عدة أشهر، لاحظت في الكثير من المرات الي أركب فيها القطار ألقى الناس ماسكة جهاز معرفتي فيه بسيطة جداً لعدم اهتمامي فيه، معلوماتي عن هذا الجهاز بشكل أساسي كانت عبارة عن "مجرد محاولة ثانية لقراءة الكتب بطريقة حديثة، ومصيرها الفشل". طوال الفترة اللي راحت، كنت متعنّت في نظرتي للكيندل وكنت مقتنع قناعة تامة ان القراءة ما تعيش تجربتها الا اذا مسكت كتاب حقيقي في يدك وقريته.

جربت الكيندل عدة مرات، ولكن المرة الحقيقية كانت في رحلتي لدبي الأخيرة مع مشهور الدبيان واللي قدرت آخذ منه الجهاز أثناء الرحلة وجربته وقريت عدّة صفحات.

عرفت مباشرة اني كنت غلطان كلياً.

أغلب تجاربي للكيندل، كانت تجارب سريعة ما امداني أحكم على الجهاز فيها. أعجبني تقنية ذكية جداً فيه وهي استخدام "طبقتين" داخل الشاشة بحيث ان الشاشة العلوية تصدر الضوء اللي ينعكس على الخلفية. هذي التقنية أسلم للعين من أي شاشة ثانية، جميع الشاشات الموجودة حالياً تصدر الضوء مباشرة على العيون وهذا له أثر سلبي كبير على العين. وأنا كانسان مصاب بانحراف نظر والـFloater "ذبابة العين"، ما كنت بحاجة الى أجهزة تزيد معاناتي مع النظر.

حاولت أبحث في موضوع خطر الكيندل على العين، وبعد بحث بسيط، ولسبب معين، فقدت اهتمامي في الكيندل. قضيت فترة لا بأس فيها الين ما وصلني الخبر اليقين من الاخت أثير اللي تعاني من نفس مشاكل العين اللي فيني، واللي أفادتني كثير في هالموضوع، بالاضافة الى مواضيع كثيرة غيرها.

جهازين جدد متحمس لهم ووصلوني في شحنة وحدة. صدمة عاطفية تقنية كبيرة

أول ما وصلتني الشحنة، فتحت الصندوق ولاحظت "ستيكر" على الشاشة مرسوم عليه أسهم واحد منها مصوب على موقع زر التشغيل، فكيت الصندوق الثاني اللي فيه الجوال وعشت لحظات "نظر مصحوبة بسكوت تام" أطالع في الجهازين باعجاب وأقلبهم بيدي وأقرب صفحات الكتالوج لخشمي وآخذ نفس عميق، طقوس غريبة ما يعرفها الا مهووسي التقنية.

شبكت الكيندل في الشاحن وأول شي لفت انتباهي هو ان "الستيكر" طلع ماهو ستيكر، طلع ان الشاشة مشتغلة بطريقة معينة بحيث ان المستخدم أول ما يفتح الصندوق يلقى التعليمات قدامه. يمكنهم بالعاني مسوين الحركة هذي كنوع من ابهار المستخدم لأول مرة يستخدم الجهاز، وفعلاً أبهروني وسألت الناس حولي واكتشفت انهم مروا بنفس حالتي.

سبب شرائي للكيندل عدة أسباب، أهمها اني ما راح أحتاج أشيل معي كتب في كل مكان عشان أقراها ، كل اللي أحتاجه اني أشغل الجهاز وأبدأ القراءة.

من الأشياء اللي أبهرتني بالجهاز، اني أول ما شغلته طلعت لي رسالة Welcome Mohammed! ترحيبية مسوينها أمازون نفسهم. اكتشفت انهم أدخلوا بياناتي الموجودة عندهم في أمازون بحيث اني ما أحتاج أسجل مستخدم جديد أو اني أعيد ادخال بياناتي. رحت أجرب أشتري كتاب وكانت الطريقة فعلاً مبهرة، ما تحتاج تاخذ أكثر من خطوتين لشراء الكتاب. كل اللي تحتاج تسويه بعد ما تلقى الكتاب انك تضغط زر الشراء ويباشر التحميل. وغالباً الكتب تحميلها سريع بالاضافة الى ان الكتب عبارة عن text فقط فأحجامها يكون صغير جداً مقارنة بالملفات المرئية أو حتى السمعية.

نظام الكيندل بعيد جداً عن التعقيد، نظام بسيط جداً تم تصميمه للقراءة فقط لا أكثر. لاحظت الكثير يسألني أسئلة غريبة مثل: "أقدر أنزل عليه برامج؟" الجواب: لا طبعاً. النظام عبارة عن قارىء للكتب لا أكثر. الكثير يتخيله جهاز تاب فيه نظام تشغيل أندرويد مثل Kindle HD وغيره، لكن هذا يختلف تماماً. هذا مجرد قارىء الكتروني وظيفته الأساسية يعرض لك الكتب تقرأها وانتهينا، وهذا واحد من أسراره الكبيرة بالنسبة لي.

نبدأ ببعض الأجوبة العامة للأسئلة اللي وصلتني على تويتر واللي أعتبرها مهمة:

حجم الجهاز:

تقدر تمسكه بكل بساطه بيد وحدة، حجمه مقارب جداً لحجم Nexus 7 وفيه ميزة ممتازة جداً وهي ان ملمس الجهاز بشكل عام مطاطي من جميع الجهاز، بمعنى انك تمسكه بيدك ويصير ثابت عكس الأجهزة اللي احتمال تفلت من اليد بسبب ملمسها.

بطارية الجهاز:

تقريباً هذا من أفضل ميزات الجهاز. البطارية فعلياً جلست معي شهر كامل. شغلت الجهاز أول ما اشتريته والى الآن ما طفيته، ما شحنته الا مرة وحدة أو مرتين فقط. الأجهزة الحديثة حسب تجربتي تعاني عموماً من مشاكل كبيرة في البطارية لدرجة ان بعض الغربيين يسمون الأجهزة الذكية 6-hour battery، وهذي المشكلة يعاني منها الأندرويد بشكل خاص، ولو ان جوجل حلّت المشكلة بشكل كبير في سلسلة أجهزة Nexus.

طريقة العرض باللغة العربية. رابط الصورة الأصلي هنا

طريقة القراءة:

وهذا هو أهم شي. طريقة القراءة عادية جداً ما فيها فلسفة اطلاقاً، تتعامل مع الصفحات بطريقة اللمس ومتى ما خلصت قراءة تلمس على علامة Home وترجع للقائمة الرئيسية للجهاز وتضغط زر "اغلاق الجهاز" ويدخل وضعية الاغلاق. متى ما بغيت تكمل تضغط نفس الزر وتفتح الشاشة وتكمل القراءة. طريقة سهلة جداً وعملية.

فيه عندك طريقتين رئيسية للاضاءة في الشاشة، اضاءة للغرف اللي نورها قوي، واضاءة للغرف اللي نورها خافت. وتقدر تغير في الاعدادات وتختار درجة السطوع اللي تناسبك.

بامكانك تضيف ملاحظات على الكتب أو حتى على الصفحات أو على الكلمات، كل اللي تحتاج تسوي انك تضلل الكلمة عن طريق الضغط عليها لمدة ثانيتين وبيطلع لك نافذة فيها خيارات، اختر خيار Add note وأضف النقطة اللي في بالك.

ضلل الكلمة اللي ما تعرف معناتها ويطلع لك تعريفها

الكتب العربية:

بامكانك تشتري كتب عربية من المتجر الالكتروني الخاص في كيندل، ولكن فيه مشاكل كثيرة من أهمها:

• قلة الكتب العربية المتوفرة.
• تأخير بسيط "lag" في التصفح والانتقال بين الصفحات.

فيه مشاكل بسيطة مثل عدم تعريف الكلمات العربية في القاموس، ولكن ما أعتقد هذي بتهم الكثير.

فيه برضو معلومة مهمة عن طريقة البحث في الكتب العربية. اذا بغيت تبحث عن كتاب عربي فلازم تبحث عنه باللغة الانجليزية! مثال: كتاب "التصرف في المال العام" للدكتور خالد الماجد تلقاه في الكينل ستور باسم The Disposition of Public Money. احتمال كبير ان هذي تسبب متاعب للقراء العرب، ولكن على الأقل فيه طريقة رسمية لشراء الكتب العربية!

عموماً، الكتب العربية قادمة على الكيندل بشكل واضح. الكثير كان يسألني عن طريقة ارسال الكتب العربية على صيغة ملف PDF من الانترنت. ما قد سويت هذي الطريقة لأن كل اللي سألتهم عن مصدر كتب الـPDF هذي قالوا انهم نزلوها من الانترنت بشكل غير قانوني، وهذي تعتبر سرقة للحقوق الفكرية وانا ضد هذا العمل جملةً وتفصيلاً.

كتاب "التصرف في المال العام" من كيندل ستور

شراء الكتب:

من أسهل ما يكون. كل اللي تحتاج تسويه انك تدخل السوق الالكتروني Kindle Store في الجهاز وتبحث عن الكتاب اللي تبغاه وتختار "شراء الكتاب" وانتهينا.

المميز في كتب كيندل انها دائماً تكون أرخص بكثير من النسخة الطبيعية "physical" للكتاب. شفت كتب كثيرة جداً أسعارها على دولار واحد فقط، وشفت كتب أسعارها ما توصل عشرة دولار، وغيرها من الأسعار المغرية جداً لشراء الكتب.

أما بالنسبة لأحجام الكتب الالكترونية، فمثل ما ذكرت في البداية انها صغيرة جداً. تحميل الكتاب الواحد ما ياخذ معك الا دقيقة وحدة اذا كان كتاب عدد صفحاته توصل آلاف. أما اذا كان كتاب طبيعي فغالباً ما  راح ياخذ معك ولا عشرين الى أربعين ثانية فقط.

تطبيق Amazon Kindle:

لعل الكثير يعرف عن الميزة هذي ولكن ما يمنع نذكرها للغير. تطبيق أمازون كيندل يعطيك ميزات ممتازة جداً بأذكر اللي أعجبني منها:

• بامكانك تنزل التطبيق على جوالك وتشتري الكتب الموجودة في مكتبة Kindle وتنزلها على جهازك وتقراها. وهذي ميزة مهمة طالما ان البعض يحسب انك اذا اشتريت الكتاب الالكتروني من أمازون فأنت ملزم انك تقراه على جهاز كيندل وهذا خطأ.
• المزامنة بين الكتب! بمعنى انك لو كنت تقرا كتاب على جهازك الكيندل، وبعدها جيت تبي تكمل القراءة عن طريق جوالك او التاب حقك فكل اللي تحتاج تسويه انك تفتح الكتاب "لازم تكون مخزن الكتاب بجهازك طبعاً" وبتلقى نفسك في الصفحة اللي وقفت عندها في الكيندل. هذي ميزة ممتازة أعجبتني مرة.

تطبيق Audible:

التطبيق المعروف، وهو باختصار عبارة عن قارئ صوتي للكتب. بدل ما تقرا كتاب هذا التطبيق يقرا الكتاب كله لك. فكرة ممتازة جداً ولو ان الكثير للأسف يعارضني عليها ويقول ان قراءة الكتب أفضل، وهذا كلام صحيح ولكن زيادة الخير خيرين. اذا يمديني أقرا الكتاب أو أسمعه فوين المشكلة؟ زيادة الخيارات لا تضر أبداً.

عموماً، التطبيق هذا أستخدمه بشكل يومي وأسمع كتب وانا رايح وراجع للعمل. فيه ميزتين تستاهل الذكر وهي:

• المزامنة بينه وبين جهازك Kindle! بامكانك تكمل استماع الكتاب من المكان اللي وقفت فيه وانت تقرا الكتاب على الكيندل، بمعنى انك تستخدم التطبيق هذا مع الكيندل بحيث تقرأ كتاب واحد بدون أي تعب. ممتازة جداً الحركة، ولكن فيها عيب أعتبره قاتل خلاني ما أستخدم الميزة هذي اطلاقاً. الميزة هذي أطلقوا عليها اسم Whispersync.
• الرجوع 30 ثانية للخلف. وأنت تسمع الكتاب، لا بد انك في وقت في الأوقات بتكون ساهي أو شارد الذهن. فلنفترض انك فجأة انتبهت ان القارئ وصل لنقطة مهمة تبغى تسمعها ولكن الكلام وصل للنص. الحل بكل بساطة انك تلمس زر العودة 30 ثانية للخلف وتسمع من جديد بانتباه وتركيز. حركة بسيطة ولكنها ممتازة جداً.

هذا بالنسبة للميزات، أما بالنسبة للعيوب، فهذا عيب قتل الميزة الأولى تماماً بالنسبة لي:

أنت مضطر انك تشتري الكتاب مرتين، نسخة الكيندل ونسخة Audible. اشتريت كتاب نسخة كيندل بقيمة 20 دولار، جيت بأشوف سعره في Audible لقيته بـ 15 دولار أو حولها.

هذا بالنسبة للميزات والايجابيات. ايش السلبيات طيب؟

بشكل عام، السلبيات بسيطة جداً ولا أعتقد انها بتأثر كثير للبعض ولكن مافيه مانع نذكرها:

• على ان مكتبة الكيندل وصلت كتبها الى مليون الا شي بسيط، الا ان المحتوى لا زال يعتبر قليل. حاول تبحث عن الكتب في موقع أمازون وشوف اذا لها نسخة كيندل أو لا، قبل لا تقرر تشتري الجهاز.
• ما فيه تعداد للصفحات. بعض الكتب تحتاج منك انك تدخل في اعداداتها وتشغل تعداد الصفحات ولكنهم حاطين لك نسبة مئوية بدالها. أعتقد سبب التخلي عن التعداد هو ان بامكان القارئ انها يكبر ويصغر الخط، وبذلك راح يختلف عليك حجم الكتاب وعدد صفحاته.

بهذا نكون انتهينا من التدوينة الثالثة. أتمنى انها تكون أفادكم ولو بشي قليل. أشكر جميع من ساعدني وكونوا بانتظار التدوينة القادمة.