ثلاث أسابيع مع النيكسس 4

لو تسأل أي شخص له علاقة بالتقنية، وتقوله ايش رأيك في النيكسس ٤؟ غالب الظن انه راح يعطيك كلام ايجابي عنه، وبيمدحه لك ويقولك انه جوال ممتاز، ولكن الأهم من هذا كله، بيقولك ان الحصول على الجوال صعب جداً. صعب جداً لدرجة اني شفت كثير من الناس اشتروا جوالات ثانية منافسة وتخلوا عن النيكسس ٤ لهذا السبب.

وبما ان كثير من الناس يسألوني عن أفضل جوالات الأندرويد بشكل مستمر، فقررت أكتب تدوينة كاملة أحاول أجيب فيها على كل تساؤلات الناس اللي سألتني عن أفضل جوالات الأندرويد، واللي أشوف أفضلها جوالات نيكسس لأسباب بأذكرها.

قصة شرائي للنيكسس ٤ طويلة، ولكنها باختصار بسيط كانت تحدي أكثر من انها رغبة. تحدي لاني لي فترة ماهي بسيطة وأنا أحس ان جوالي الجالاكسي نيكسس صار "أقل من عادي" لو قارناه بالجوالات الموجودة. وهذا مو شي غريب طالما ان من اعلان جوجل عنه وكل الناس تعرف ان مواصفات الجهاز عادية، ولكن أداءه كان فعلاً جبار وسريع، لدرجة اني دائماً أقول للناس انه أسرع جوال أندرويد بدون أي منافسة. أعتقد ان هذا مرتبط بكون النظام من جوجل نفسها وخالي من فلسفة سامسونج واتش تي سي وغيرهم من الشركات اللي تدعم أندرويد ولكنهم -حسب رأيي- حاسوا وخربطوا في النظام الين ما فقد هدفه الأساسي.

شعار Nexus الرسمي

معاناتي مع شراء النيكسس ٤ انتهت قبل ثلاث أسابيع بعد مالقيته بسعر معقول "١٧٠٠ ريال ذاكرة 16 جيجا" في الموقع المعروف eBay، ولو ان السعر المعقول هذا ارتفع الى سعر غير معقول بسبب ارتفاع أسعار الشحن. بعد وصول الجوال وبعد انتظار طويل، بدأت أستخدم الجهاز وقررت أكتب رأيي عنه كمستخدم فقط وليس كشخص تقني مهتم بالتفاصيل الدقيقة.

أضف الى ذلك، ان فيه موضوع يهمني بشكل كبير وهو سلسلة النيكسس. الكثير من الناس يجهلون النيكسس ولا يعطونه حقه، خصوصاً الناس اللي حولي سواءً في الانترنت أو في الحياة، الكل يسمع بسامسونج ويمشي ورا الكلام ويحسب ان سامسونج هي اللي تعطي التجربة الحقيقية للأندرويد، وهذا أشوفه أكبر خطأ.

من وين جا النيكسس بالضبط؟

من جوجل، وهذا شي يعرفه الكثير ولكن بالمقابل يجهله الكثير. أول ما نزل الأندرويد كانت تدعمه شركات مثل سامسونج واتش تي سي وغيرها الكثير. ولكن نظراً للتنافس اللي يصير بين الشركات، فطبيعي ان كل شركة تبغى تميز نظامها عن الشركة المنافسة لها، وبما ان شركات كثيرة تستخدم أندرويد كنظام لتشغيل أجهزتها، وبما ان أندرويد نظام مفتوح للكل، فطبيعي برضو ان كل شركة بتغير في النظام تغييرات تحاول فيها انها تجذب المستهلكين لها.

وهنا نوصل للمشكلة الأساسية، مشكلة الشركات اللي تستخدم نظام أندرويد انها اهتمت بتميز نفسها عن منافسيها الى درجة -حسب رأيي- قامت تخرب وتحوس في النظام الين ما صار بعيد عن الهدف الأساسي لأندرويد. خذ عندك التطبيقات اللي يحطونها بعض الشركات مثل سامسونج، تطبيقات كثيرة وحوسة ما أستفيد منها بأي شكل من الأشكال. أضف الى ذلك الـ Touch Wiz البشع اللي تستخدمه سامسونج، وغيرها الكثير من الأمثلة.

سلسلة نيكسس، او عائلة نيكسس

لهذا السبب، قررت جوجل انها تنزل سلسلة باسم نيكسس Nexus series بحيث أنت يالمستخدم تاخذ التجربة الحقيقية لنظام أندرويد بدون أي اضافات وفلسفة، واللي نسميه Pure Android، بالتعاون مع أحد الشركات المعروفة بتصنيع قطع الجهاز Hardware. تعاونت جوجل مع شركات عديدة منها HTC وسامسونج وقريباً بنشوف توسع كبير وتعاون مع شركات أكثر.

كنت مستخدم جالاكسي نيكسس؟ ما راح تشوف فرق كبير

كمستخدم سابق لجالاكسي نيكسس، اللي هو جوال جوجل الرسمي في ٢٠١١ بالتعاون مع سامسونج، ما لاحظت فيه فرق كبير في النظام. كل شي في النظام نفسه بما ان الجهاز مدعوم بشكل مباشر من جوجل، بحيث جميع التحديثات للنظام توصلني قبل أي جهاز ثاني، عكس سامسونج واتش تي سي وسوني وغيرها اللي تحديثاتها تتأخر بالشهور وبعضها ما ينزل التحديث أساساً.

الفرق اللي بتلاحظه في الجهاز نفسه، مثل سرعة الجهاز والشاشة والكاميرا وغيرها من قطع الهاردوير. عدا عن ذلك، الجهاز هو نفسه تقريباً. ومن هنا راح أبدأ ببعض الملاحظات اللي لقيتها خلال استخدامي للنيكسس ٤.

من تصوير النيكسس 4

هل النيكسس ٤ أفضل من الجالاكسي نيكسس؟

بما ان النيكسس ٤ هو الاصدار الحديث للجالاكسي نيكسس، فطبيعي انه بيكون أفضل من نواحي كثيرة. النيكسس ٤ سريع جداً بما ان معالجه أفضل من معالج الجالاكسي نيكسس بكثير، فلاحظت الانتقال بين البرامج وفتحها واغلاقها أسرع بكثير من الجالاكسي نيكسس.

مشكلة الكاميرا!

اللي يعرف الجالاكسي نيكسس، بيعرف ان من أكبر نقاط ضعفه الكاميرا. وعلى الرغم اني أشوف تصوير الجالاكسي نيكسس ممتاز، الا ان الغالبية من الناس يخالفوني في الرأي. عموماً، مشكلة الجالاكسي نيكسس كانت ان كاميرته قوتها ٥ ميجا بيكسل فقط. أما بالنسبة للنيكسس ٤، فالكاميرا ٨ ميجا بيكسل وهذا بطبيعة الحال أفضل.

لكن المشكلة اللي لاحظتها في النيكسس ٤، اذا حولت جودة الصورة الى أعلى شي HDR ألاحظ الكاميرا تعلّق تعليق خفيف اذا صورت. متعود اني أنزل الجوال في اللحظة اللي أشوف فيها فلاش خفيف على الشاشة، اللي يعني انه تم التقاط الصورة، ولكن كثير من المرات لمن أدخل الجاليري وأشوف الصورة، ألقاها مختلفة تماماً عن الصورة اللي صورتها. شكل الصورة يطلع في الجاليري كأني مصور وانا أتحرك أو أركض.

لازم تثبت الجوال بعد ما تلمس زر التصوير لثانية أو ثانيتين، أو الصورة -غالباً- بتصير زي كذا

فيه مشكلة ثانية، وهي ان الشاشة ما تعرض لك الصورة اللي في الكاميرا بشكل كامل! بمعنى انك اذا صورت شي ورحت تشوفه في الجاليري بتشوف أشياء ثانية في الجوانب ما كانت ظاهرة لك وأنت تصور. ياكثر ما صورت أشياء واذا رحت الجاليري ألقى أشياء طالعة من اليمين ومن اليسار ما كنت أبغاها تطلع في الصورة. هذي المشكلة ظهرت لي بعد التحديث الأخير -واللي أعتبره اول تحديث سيء للنظام- واللي المفترض انه يطّور الكاميرا، لكن يبدو لي انها صارت أسوأ.

هل شكل النيكسس ٤ أفضل من الجالاكسي نيكسس؟

أفضل بمراحل، اللي شاف الجالاكسي نيكسس، غالباً بيذكر شكله البشع من الخلف. شكله كان جداً بشع بالاضافة الى ان شكل الجهاز عموماً يعطي انطباع انه رخيص جداً، عكس النيكسس ٤ تماماً اللي واضح عليه علامات الفخامة، خصوصاً من الخلف.

من الملاحظات البسيطة جداً هي ان النيكسس ٤ أعرض بشي بسيط جداً من الجالاكسي نيكسس. كثير من الناس اللي أعرفهم كانوا يشتكون من عرض جوالات أندرويد وانه ما يقدرون يستخدمونها بيد وحدة. أعتقد ان هذي ملاحظة مهمة للناس اللي كذا.

نيكسس 4 من الخلف

فيه ملاحظة مهمة جداً، وهي ان النيكسس ٤ يحتوي على غطاء زجاجي من الخلف، احتمال ينكسر من أول طيحة، واحتمال ما ينكسر. لذلك أنصح أي شخص يشتري الجهاز انه يشتري معه الـbumper الرسمية مع الجهاز. الحامي الرسمي ميزته انه ما يكبر حجم الجهاز الا شي بسيط جداً يصعب على أي شخص انه يلاحظه.

الصوت أفضل بمراحل

من مشاكل الجالاكسي نيكسس الكبيرة، ضعف الصوت. اذا حولك أي شخص معه جالاكسي نيكسس، خله يشغل لك مقطع يوتيوب أو أغنية ويرفع الصوت على الآخر. بتلاحظ على طول ان مستوى الصوت واطي لدرجة غريبة. المشكلة هذي تم حلها بشكل نهائي في النيكسس ٤، أرفع الصوت على الآخر وألاحظ انه عالي جداً، ويمكنه أصفى وأفضل بما ان مخرج الصوت أكبر، ولو ان موقعه أعتقد انه خطأ. كثير من المرات ألاحظ ان يدي تغطي مكان الصوت. واذا حطيت الجوال وأنا مشغل شي ألاحظ الصوت يصير واطي مرة، واذا رفعته يرتفع وهذا بسبب موقع مخرج الصوت كونه في ظهر الجهاز.

موقع مخرج الصوت: ركّز فوق على اليسار بتلاحظها.

هل شاشة النيكسس ٤ أسوأ من الجالاكسي نيكسس؟

هذا سؤال أحدث جدل كبير بين الناس، غالبية الناس تقول ان شاشة الجالاكسي نيكسس أفضل من النيكسس ٤. 

لكن الأكيد فيما يخص الشاشة ان سطوع شاشة النيكسس ٤ أعلى بكثير من الجالاكسي نيكسس، وهذا يعني انها بتفيدك أكثر اذا كنت في مكان مشمس.

تحديثات الجهاز

وهذي من أهم المواضيع ومن أكثر الأسئلة اللي توصلني. الجهاز من جوجل، وبطبيعة الحال انها راح تدعمه بشكل مباشر. لذلك أول ما تسمع ان فيه تحديث جديد للنظام فهذا معناته ان أول جهاز بينزل عليه هو الاصدار الأخير لجوالات نيكسس وأجهزتها اللوحية. 

آخر اصدار أندرويد، وجميع التحديثات بتوصلني أول بأول.

وللتحديثات تنبيه لازم يعرفه الكل. في الآيفون التحديثات تكون بشكل مباشر، كل اللي تحتاجه تشبك الجوال في الكيبل بالكمبيوتر وتبدأ عملية التحديث أو يوصلك عن طريق التنبيهات وانتهينا. أما في النيكسس فهي تختلف. غالباً التحديثات توصلك على شكل تنبيه، ولكن اذا مستعجل عليها اللي  فعليك انك تروح لقائمة Settings وتختار About phone وبعدها تختار System updates والمفروض انك تلقى الأبديت. وفي حال انك مالقيتها، روح Settings > Apps > Google Services Framework واختر Clear Data. بعدها ارجع Settings > About phone > System Updates وبتلقى الأبديت جاهز. هذي الطريقة أنا جربتها شخصياً مع الجالاكسي نيكسس وضبطت لذا فهي مضمونة من ناحيتي. ولا تسمع كلام اللي يقولك سوي روت لجهازك وروم وخرابيط وتشتيت أفكار. الطريقة هذي تعلمتها من الأخ عبدالله المديفر.

البطارية

أفضل بطارية لجوال أندرويد استخدمتها الى الآن. من زمان كنت أقول ان الجالاكسي نيكسس بطاريته جيّدة اذا ما قارناها بجوالات ثانية مثل الجالاكسي اس 2 والاتش تي سي. لكن بطارية النيكسس 4، أفضل منهم كلهم. وبالمناسبة، اذا تبحث عن جوال بطاريته تطوّل معك فعليك بالجالاكسي نوت 2، حسب ما سمعت ان بطاريته تجلس معك يومين بالراحة.

وبما اني مستخدم تابليت نيكسس 7، فاستخدامي للجوال ماهو كثير. البطارية تجلس معي يوم كامل بدون شحن ولكني لا زلت أحرص اني أشحن الجوال في أي وقت.

ايش البرامج والملفات اللي نقلتها من جوالي القديم الى الجديد؟

ولا شي. لأن كل شي مرفوع على حسابي في جوجل. الصور والفيديو والتطبيقات والأغاني كلها مرتبطة بحسابي. العجيب ان حتى خلفية الجوال انتقلت الى جوالي الجديد.

لأول مرة، أمسح بيانات الجهاز كلها بدون ما أشيل هم ضياع أي شي، لأن كل شي مرتبط بالحساب

وهذا واحد من اهم أسباب ميولي للاندرويد، النظام أساساً Cloud-based أي مبني على السحاب "الانترنت" وكل شي تسويه في الجهاز يرتبط في حسابك. صحيح ان المنافسين أمثال آبل ومايكروسوفت الآن دعموا هذي الميزة بشكل جدي وواضح، ولكن تبقى جوجل هي الاولى الي قدمت لي هذي التجربة من شريت أول جوال أندرويد لي، Galaxy S I.

أبغى اجرب الأندرويد، لكن محتار أي جوال أشتري؟

نصيحتي لك: اشتر أي جهاز نيكسس. الأسباب مثل ما ذكرت فوق، ومن أهمها انه من جوجل نفسها ولا له أي علاقة بأي شركة ثانية.

جوالات النيكسس حالياً قليلة أو بالأحرى، جوال واحد كل سنة. جوجل مشت على هذا النظام لسنوات ولكن مؤخراً أعلنت انها راح تبدأ تنوع في الجوالات والتعاون مع شركات أكثر، بمعنى انها بتنزل أكثر من جوال في السنة الوحدة ومن شركات مختلفة عشان نتاسب اختيار الجميع بعد ما نجحت سلسلة النيكسس. لذلك توقع في أي وقت ان جوال نيكسس جديد بينزل حتى لو مرت فترة بسيطة على النيكسس الأخير.

أخيراً، أتمنى ان التدوينة أفادتك عزيزي القارىء ولو بمعلومة بسيطة. آسف مقدماً ان كان فيه أخطاء، ولو اني حاولت قدر الامكان اني ما أكتب شي الا وأنا متأكد من مصدره.واذا فيه خطأ فياليت تذكره لي وأنا بأعدله.