انطباعات عن النيكسس 5

بعد حوالي سنة من الانتظار، أخيراً نزل نيكسس 5. وصلني قبل حوالي أسبوع من كتابتي لهذا الانطباع. ما أعتقد انها فترة كافية للحكم على الجهاز لذلك سميتهامجرد  "انطباعات".

أما بالنسبة لكتابتي للانطباعات وعدم كتابتي لتقييم عام للجوال، فهو بسبب خوفي اني ما أكتب شي عن الجوال أبداً. نادراً ما ألقى وقت أكتب فيه شي لغير سعودي جيمر.

ما يحتاج نكثر كلام، لذلك بندخل في صلب الموضوع. أغلب الايجابيات اللي بأكتب عنها هي تطويرات بديهية، تصير مع أي جهاز جديد في العالم. وبما اني مستخدم لكل أجهزة النيكسس،فراح تلاحظ ان جزء كبير من المقارنة بيكون مع أجهزة النيكسس اللي قبل.

الايجابيات

شاشة أفضل

أول التطويرات البديهية، لكن هالمرة انبهرت فيها من أول نظرة. شاشة النيكسس 4 ما كانت تعجبني أبداً، ولو ان البعض يختلف معي فيها. كنت أعتقد ان شاشة الجالاكسي نيكسس أفضل بكثير من شاشة النيكسس 4!

شحن أسرع

اللي يعرف جوالات أندرويد بيعرف ان شحنها بطيء جداً اذا ما قارنته بالآيفون. سلسلة جوالات نيكسس كانت تعاني من هذي المشكلة، ولكن مع النيكسس 5 تم تحسين الشحن بشكل ملحوظ. في آخر أيامي مع النيكسس 4 كنت ألاحظ ان الأوقات اللي يكون الجوال مشبوك فيها في الشاحن أوقات طويلة جداً، لدرجة اني صرت أحس ان الوقت اللي يقضيه الجوال وهو في يشحن قريبه من أوقاته وهو مفصول من الشاحن. مع النيكسس 5، مشكلة الشحن البطيء لا زالت موجودة لكنها تحسنت بشكل كبير.

ملمس مريح وفخم

من أهم ميزات جوالات النيكسس في السنتين الأخيرة، هو ان الأجهزة يتم صنعها من مواد بلاستيكية ملمسها كأنه مطّاطي، بحيث تحس ان الجهاز ثابت في يدك ولا تشيل هم انه يطيح، عكس كثير من الجوالات مثل HTC One، اللي كل ما مسكته أخاف انه يفلت من يدي!

موقع سماعات أفضل

موقع السماعات في النيكسس 4 كان سيء جداً، موقعه في ظهر الجوال. الغريب انك اذا حطيت الجوال ما راح تسمع صوته الا بصعوبه، وتقدر تلاحظ الفرق في الصوت في اللحظة اللي تشيل فيها الجوال اذا كان يرن.

المشكلة هذي تم حلها في النيكسس 5، بحيث صار موقع السماعات في أسفل الجوال - مثل الآيفون- ولو ان السماعات نفسها فيها مشكلة شبيهة بمشكلة الجالاكسي نيكسس، وهي ان صوت الجوال بعض الأحيان تحس انه منخفض!

تعديل الكيبورد الأساسي

وهذي ميزة ما تهمني كثير لكن تهم البعض، الحروف كلها صارت ظاهرة قدامك. الكيبورد قبل كان فيه حروف مخفية مثل الذال والثاء، بحيث تعلق على حرف الدال والتاء عشان تطلعهم.

نظام أفضل، أسرع، أكثر استقرار

جوجل لها سنتين تقريباً ما حدثت نظامها تحديث جذري، كل اللي نشوفه تحديثات تتراوح من بسيطة الى متوسطة. كل هذي التحديثات كانت تساعد النظام في انه يكون أسرع، أفضل،أكثر استقرار. نظام أندرويد 4.4 أضاف لمسات جيدة من ناحية التصميم، مثل تغيير الألوان ودمج خدمة جوجل ناو في النظام بشكل أكبر.

أما من ناحية سرعة النظام، فاستخدام الجوال سلس وسريع، مثل ماهو معروف عن جوالات نيكسس، وهذي من أهم الأسباب اللي تخليني أميل لجوالات نيكسس ولا أفكر في غيرها.

برضو من ناحية استقرار النظام، فالنظام مستقر الى درجة ممتازة. من بعد تحديث أندرويد 4.2 وأنا ما أواجه أخطاء كثيرة مع التطبيقات أو النظام الا نادر جداً، وأندرويد كيت كات ساهم في هذا الاتجاه بحيث ما واجهت أي مشكلة في النظام الى الآن -باستثناء الخطأ البرمجي الغريب اللي في الكاميرا-.

السلبيات

الكاميرا لا زالت سيئة

وهذي من أكبر الاحباطات، صحيح ان الكاميرا أفضل بكثير من النيكسس 4، لكن التطبيق نفسه سيء جداً، وبطيء جداً. والأدهى والأمر من هذا كله ان التطبيق نفسه يعاني من مشاكل كبيرة، أهمها انك اذا شغلت ميزة Face Unlock راح تلاحظ بعد ساعات ان تطبيق الكاميرا كله صار يعلق ولا تشتغل! لقيت نفسي مضطر أتخلى عن أهم ميزات أندرويد بسبب هذا العطل السخيف.

البطارية لا زالت ضعيفة

هذي برضو من أكبر الاحباطات، كنت متأمل كثير ان جوجل تحسّن من عمل البطاريات في جوالاتها. الحق ان البطارية أفضل من النيكسس 4 بكثير، لكنها برضو لا زالت تعتبر ضعيفة اذا قارنتها بجوالات ثانية. بعض الأحيان تجلس معي البطارية ٨-١٠ ساعات بعدها أضطر أشحن الجوال!

اشارة الاتصال بالانترنت (الاتصال بخدمات جوجل)

وهذي من أعاجيب جوجل.  مستخدمي أندرويد غالباً يعرفون معنى لون أيقونات أبراج الجوال وأبراج الانترنت الموجودة في أعلى الجوال على اليمين، وهي ميزة تخليك تعرف هل انت متصل بالانترنت او لا من الشاشة الرئيسية للجوال. اذا كانت باللون الرصاصي فمعناته ان خدمات جوجل ماهي قادرة تتصل بالانترنت، وهذا يعني ان جوالك ماهو قادر يتصل بالنت أو انه ما هو مشبوك بالانترنت من الأساس. أما اذا كانت باللون الأزرق، فمعناته ان خدمات جوجل متصله بالانترنت، وهذا يعني ان جوالك متصل بالانترنت طبعاً.

الميزة هذي تغيرت بشكل سخيف في نسخة أندرويد 4.4 كيت كات، وصار ألوان الأيقونات كلها بالأبيض، سواءً كنت متصل بالانترنت أو غير متصل. اذا تبغى تشوف هل خدمات جوجل متصلة بالانترنت أو لا، فلازم تسحب شريط التنبيهات، من هناك تقدر تعرف هل انت متصل بالانترنت أو لا. بعد ما تسحب شريط التنبيهات، بتشوف أيقونات أبراج الاتصال وأبراج الانترنت، اذا كانت باللون الأبيض فمعناته انك متصل بالانترنت، أما اذا كانت باللون البني فمعناته انك غير متصل بالانترنت.

هذي مشكلة كبيرة بالنسبة لي، من زمان كنت تقدر تعرف هذا كله أول ما تفتح الجوال، أما الحين فصار لازم عليك تسحب شريط التنبيهات ومن هناك تقدر تعرف. تقول جوجل ان هذا قرار له علاقة 

هذا انطباعي عن النيكسس 5 بعد أسبوع من استخدامه. رأيي بشكل عام عن الجهاز ماني قادر أحدده الى الآن، بما اني لاقي أشياء كثيرة أعجبتني ولكن أشياء كثيرة برضو أحبطتني، خصوصاً الكاميرا والبطارية!

هل أنصح بشراء جوال نيكسس 5؟ لا زلت أنصح فيه على كل هالعيوب، ولا زلت أشوفه أفضل جوال يقدم تجربة أندرويد. عموماً، اذا كنت مهتم جداً بالبطارية والكاميرا فما أنصحك تشتريه، أما اذا كنت تبحث عن نظام ذكي وسريع فهذا أفضل جوال تقدر تحصل عليه من هذي الناحية!