تجربتي مع الكروم بوك

مشروع جوجل كروم مشروع قديم نوعاً ما، أعلنت عنه جوجل قبل في 2009، وقالت انه عبارة عن نظام تشغيل يحتوي على براوزر "متصفح انترنت" فقط لا أكثر. الأسباب لصنع هذا النظام كثيرة، ولكن أهمها حسب كلام جوجل ان ٩٠% من وقت جلوسنا على الكمبيوتر يكون على البراوزر فقط. لذلك، قررت جوجل انها تتخذ قرار جريء وهو استبعاد جميع البرامج الموجودة في أنظمة التشغيل المعتادة والاكتفاء بنظام داخله براوزر يكون مستعد للأستخدام بعد حوالي ٥-٦ ثواني من ضغطك لزر التشغيل.

أعجبتني الفكرة، وشفت لها فيديوز كثير على يوتيوب قبل سنة ولكن للأسف، أسعار الأجهزة كان مبالغ فيها جداً على الرغم من ان دعايات النظام كانت مغرية بالنسبة لي. ذكر النقاد ان هذا النظام هو "النظام المستقبل" لأسباب من أهمها الاعتماد الكامل على الانترنت، بمعنى ان كل شغلك يكون على الانترنت فقط. وذكر بعض النقاد ان الشركات المختصة بالأنظمة راح تحوّل أنظمتها الى هذا الاتجاه في المستقبل. برضو ذكر النقاد نقطة سلبية جداً وهي سعر الجهاز، كانت أسعار الأجهزة اللي تدعم الكروم بشكل رسمي حوالي ٤٥٠ دولار أو حتى أغلى.

بعد الانتظار لعدة شهور نزلت جوجل فيديو عبارة عن "جولة" في النظام، وهذا اللي كنت أنتظره. لاحظت النظام بسيط جداً، وسريع جداً تماماً مثل ما وعدت جوجل. ذكرت برضو جوجل موضوع التزامن والتوافق بين كروم بوك وبين أجهزة جوجل الثانية اللي تدعم أنظمة أندرويد، وبما اني أملك جوال نيكسس وتابليت نيكسس ٧ وشفت التزامن الجميل اللي بينهم، اقتنعت بالكروم بوك زيادة. ولكن كان فيه سؤال كبير يواجهني دائماً: هل أنا فعلاً أحتاج الكروم بوك؟

طبعاً، استشرت الكثير من الأصدقاء قبل لا أشتريه وكان سؤال الكل لي سؤال واحد: "أنت عندك لابتوب يغنيك عن هذا الجهاز، وبرضو عندك نيكسس ٧، ليش تشتريه؟ ما نشوف انك تحتاجه" هذا السبب الرئيسي في عدم شرائي للكروم بوك قبل سنة، بالاضافة الى غلاء سعر الأجهزة اللي تدعمه.

نيكسس ٧، أول تابليت أشتريه.

بما ان نظام الكروم بوك مبني على اللينكس، واللينكس بطبيعته نظام مفتوح، كان نظام الكروم بوك متوفر للجميع. وأشكر الأخ عبدالله القرني على توفير النظام وايضاح طريقة تركيبه خطوة خطوة في تدوينة له. بامكانك تشوف الرابط وتنزل النظام وتجربه على جهازك اذا كان جهازك يشغل ويندوز، لكن لازم أنبّه اني لاحظت مشاكل في النظام غريبة ولا شفتها في جهاز الكروم بوك اللي اشتريته. بعض المشاكل اللي واجهتها بعد تركيبي لنظام الكروم بوك على كمبيوتري كانت:

• بعد تركيب نظام الكروم بوك وتجربته على اللابتوب اللي عندي، لاحظت ان النظام الأساسي "ويندوز ٧" واجه بعض المشاكل الغريبة مثل عدم تحديث الجافا وبعض المشاكل اللي منعتني من تشغيل بعض المواقع بشكل صحيح مثل عدم قدرتي على مشاهدة فيديوز في يوتيوب!
• اذا شغلت نظام الكروم بوك ورجعت لويندوز، ألاحظ ان الساعة دائماً تتغير من نفسها.
• عدم قدرة نظام الكروم على العمل بشكل صحيح على اللابتوب، كثير من المرات ألاحظ ان النظام بطيء الاستجابة بالاضافة الى عدم قدرتي لتحميل التحديثات اللي تنزل بشكل تلقائي.

انطباعي عن النظام كانت ايجابية الى حد كبير، ولاحظت سرعة تشغيل الجهاز واطفاءه الممتازة. لكن لاحظت ان النظام بسيط جداً لدرجة اني اقتنعت وقتها انه ما راح يفيدني، كل ما ضغطت على أي أيقونة يروح يفتح لي البراوزر ويشغل كل شي عن طريق الانترنت؟ حسيته نظام صغير جداً.

قررت اني أتخلى عن الفكرة وأكمل استخدامي للنيكسس ٧، اللي لا زلت معجب فيه وكنت أستخدمه يومياً بوقت لا يقل عن ٨ ساعات. وكنت آخذه معي للعمل وأستخدمه، ومرت علي أيام كثيرة ما أشغل كمبيوتر العمل اذا كنت أقضي أوقات بريك وأحتاج فيها لانترنت.

النيكسس ٧ تاب ممتاز، وأعجبني كثير وكنت أستخدمه في كل مكان وفي كل وقت. أعجبني حجم الجهاز وخفته ودعم جوجل الحقيقي له وبرضو الدعم الملحوظ من المطورين. لكن فيه مشكلتين خلتني أرجع أفكر من جديد بالكروم بوك:

•  مشكلتي الأزلية مع أي جهاز يستخدم تقنية اللمس وهي الكتابة. من عرفت التقنية هذي وأنا أشتكي من الكتابة على الأجهزة اللي ما تدعم الكيبورد الحسي Physical keyboard.
• المتصفح وما أدراك مالتصفح، الكروم متصفح ممتاز ماعليه اختلاف، ولكن تبقى مشكلتي الكبيرة عالقة مع أي متصفح متنقل mobile browser. من المشاكل اللي كنت أواجهها انه أبطأ بكثير من المتصفحات العادية، أضف الى ذلك ان أغلب المواقع تفتح معك بنسخة الموبايل وهذا شي غير مقبول بالنسبة لي أبداً.

أخيراً، السنة هذي أعلنت جوجل عن قائمة جديدة لكمبيوترات تدعم نظام كروم بوك وبسعر معقول جداً، معقول لدرجة ان أي شخص بامكانه يشتري الكمبيوتر ولو للتجربة، تماماً مثل ما سويت.

بعد تفكير طويل، قررت اني أغامر وأشتري الجهاز وآخذ التجربة بالشكل الكامل، تركيب نظام على نظام ثاني ما أعطتني التجربة الحقيقية ولا لواحد منهم. طلبت الجهاز من أمازون وكان سعر الجهاز حوالي ٩٣٠ ريال فقط. وكان رخص الجهاز السبب الرئيسي في شرائي له.

٩٣٠  ريال فقط

بعد وصول الجهاز لي وبعد أول تجربة، شفت بعض الأشياء اللي كنت أعرفها قبل لا أشتري الجهاز، وبرضو لاحظت أشياء كانت جديدة علي، وهي كالتالي:

• الجهاز خفيف جداً، ونحيف جداً، وحجمه صغير جداً! يمديك بكل سهولة تشيله بيد وحده وتاخذه معك وين ما تروح.
• على ان الجهاز رخيص وقطعه واضح انها رخيصة، الا ان شكل الجهاز لا بأس فيه، لدرجة ان الكثير من الناس يحسبونه جهاز من آبل. طبعاً هذا برضو يرجع للشبه الكبير بين الجهازين.
• شحن الجهاز سريع، وبطاريته تجلس معك الى حوالي ٥-٦ ساعات. لاحظت برضو ان استهلاك البطارية يعتمد بشكل رئيسي على سطوع الشاشة. اذا كان السطوع منخفض بامكانك تطول الفترة الى اعلى من ٦ ساعات. أما اذا كان السطوع عالي، فاحتمال كبير ان البطارية ما تجلس معك أكثر من ٤ ساعات.
• النظام سريع جداً نظراً لبساطته مثل ما ذكرت، كل اللي فيه متصفح كروم وثلاث برامج خفيفة وبسيطة. واحد لعرض الصور، وثاني لعرض الفيديو، وثالث لتشغيل الفيديو. حرفياً من ضغطتك لزر التشغيل الى استخدام للجهاز ما تاخذ أكثر من ٦-٧ ثواني، واغلاق الجهاز ما ياخذ أكثر من ٤ ثواني.
• بعد تشغيلي للجهاز واستخدامه لساعات بسيطة، ظهرت لي علامة جنب الساعة تقول ان تم تنزيل تحديث للنظام في جهازك وان الجهاز يحتاج اعادة تشغيل عشان يشغل التحديثات!
• بما اني طلبته من أمازون، فالكيبورد ما هو مطبوع عليه حروف عربية طبعاً. ما أشوفها مشكلة كبيرة اذا كنت تستخدم الانترنت لسنوات، كان سهل جداً علي اني أعرف مواقع الحروف العربية.
• كنوع من التحفيز لشراء الكروم بوك، قررت جوجل اعطاء ١٠٠ جيجا مجانية لمدة سنتين لأي شخص يشتري الكروم بوك.
• عدم وجود فتحة ايثرنت كيبل! من أكبر المفاجآت اللي لاحظتها. تفرجت على مراجعة غربية للجهاز وذكر صاحب الفيديو ان فيه "قطعة" تجي مع الجهاز تركبها مكان اليو اس بي والجهة الثانية منها تقدر تشبك فيها كيبل الايثرنت، لكني متأكد انها ماهي موجودة في الصندوق اللي وصلني من أمازون.
• ذاكرة ١٦ جيجا فقط. جوجل تبغى تحفّز مستخدميها على استخدام الانترنت بشكل أساسي، لذا يعطونك ١٠٠ جيجا مجانية عشان ترفع كل ملفاتك في حسابك الخاص في Google Drive.

بدأت مشوار الاختبار الحقيقي والفعلي للجهاز، أداء الجهاز ممتاز جداً في التوجه اللي متخصص فيه، وهو تقديم تجربة سريعة وخفيفة لأي شخص يحتاج انترنت في كل مكان. بدأت آخذه معي الدوام وأستغني عن اللابتوب اللي كنت آخذه معي كل يوم، واللي أول ما أوصل الدوام أشغله وأطلع أسلم على زملائي وأسولف معهم وأعطي اللابتوب الوقت الكافي للتشغيل.

١٠٠ جيجا مجانية لمدة سنتين.

أما بالنسبة للنقاط الايجابية، فهي كثيرة ولكن أهمها:

• سهولة استخدام الجهاز مثل ما ذكرت. كل اللي تحتاج تسوي تفتح الكمبيوتر وتنتظر ٦-٧ ثواني وتدخل الباسوورد ليوزرك وتبدأ تستخدم الانترنت بشكل مباشر بدون أي انتظار على الاطلاق.
• دعم اللغة العربية بالكامل. كل شي في الجهاز تقدر تحوله الى اللغة العربية.
• حل مشكلة تقنية اللمس اللي كنت أواجهها بشكل كامل. بعد ما كنت أعاني من كثرة الأخطاء وبطء الكتابة في شاشات اللمس، رجعت استخدم كيبورد طبيعي ويفي بالغرض.
• حل مشكلة فتح المواقع بنسخة الجوال. الآن جميع المواقع تفتح معي بالشكل الطبيعي اللي تشوفه في الويندوز أو الماك تماماً.
• المزامنة والترابط الجميل بين منتجات جوجل اللي تملكها. اذا كنت تستخدم جوال أندرويد وتابليت أندرويد، تقدر تستخدم نفس الحساب مع الكروم بوك وتلقى كل صغيرة وكبيرة موجودة عندك في الكروم بوك. الصور،  الفيديو، المواقع اللي تزورها كثير والباسووردز اللي حفظتها، كل شي تسويه موجود عندك في الكروم بوك.
• التطبيقات الموجودة في الكروم ستور كثيرة وتؤدي معظم أغراضك اليومية. كثير يسألني عن بديل للمايكروسوفت أوفيس وهو موجود زمان، اللي هو Google Docs.
• سهولة التعلم على النظام. بما ان النظام عبارة عن متصفح انترنت، فما فيه شي تحتاج تعرفه عشان تستخدم الجهاز. كأنك تستخدم متصفح كروم على الويندوز تماماً.
• التحديثات! تحديثات النظام كلها يتم تحميلها بشكل مخفي Background عكس ويندوز على سبيل المثال، اللي كل شوي يطلع لك تحديث للجافا بشكل متكرر ومزعج. أضف الى ذلك تحديثات البرامج. كثير من المرات أفتح سكايب أبغى أستخدمه بسرعه وأتفاجىء بوجود تحديث.

بشكل عام، أعجبني الجهاز جداً. ولكن ما فيه شي يخلو من عيوب، وبعد التجربة الكاملة اللي تعدت ثلاث شهور، أقدر ألخّص السلبيات اللي لاحظتها في الكروم بوك كالتالي:

• مشكلة كبيرة جداً في النظام وهي ضعف الانترنت بعد استخدامك للجهاز بعد ساعتين أو ثلاث. تلاحظ ان الانترنت صار بطيء لدرجة اني أحياناً أضطر أقفل الوايرلس وأرجع أشغله من جديد عشان يرجع لسرعته الطبيعية. بحثت عن الموضوع الخطير واكتشفت ان جوجل عندها خبر بالموضوع وانها تشتغل على حله هاليومين.
• بالنسبة للجيمز والجيمرز، كثير من الألعاب لا زالت ما تدعم الكروم بوك مثل Bastion. برضو فيه ألعاب المفروض انها تشتغل ولكن لسبب ما ما تسوي تحميل للملفات الأساسية للعبة، مثال ذلك From Dust. احتمال ان المشكلة هذي متعلقة بنوع الكمبيوتر اللي عندي.
• لا زالت التطبيقات الموجودة غير كافية، أول تطبيق لاحظت غيابه هو Skype. فيه تطبيقات تدعم سكايب لكن كلها غير رسمية وأداءها غير مقنع للآن. جوجل تقول لمستخدميها عندكم Google Hangouts، ولكن كم عدد الأشخاص اللي يستخدمونها؟ قليل جداً مقارنة بسكايب.
• جميع المواقع تشتغل معي بنسخة الويب العادية، ما عدا موقع بنك الرياض يفتح معي بنسخة المتصفح المتنقل. احتمال ان المشكلة متعلقة بالموقع نفسه.
• اذا خليت تاب مفتوح لفترة فوق العشرين دقيقة بدون ما تستخدمه ورجعت تفتحه، بتلاحظ انه بيرجع يحمل الصفحة كلها من جديد.
• اذا فتحت عدد كبير من التابز، تقريباً فوق العشرين تاب، بتلاحظ ان الجهاز يبدأ يصير بطيء في التنقل بين التابز. أعتقد ان هذا له علاقة بالمواصفات التقنية البسيطة للجهاز، خصوصاً ان الجهاز يستخدم معالج جوال وليس معالج كمبيوتر.

باقي السؤال الأخير اللي يواجهني دائماً وأبداً: هل تنصحني أشتري الكروم بوك؟

يعتمد على احتياجاتك، اذا عندك لابتوب سريع -ولو انه مستحيل يكون أسرع من الكروم بوك- ومقتنع بأداءه معك فما تحتاج الكروم أبداً. أما اذا كنت مثلي تعاني من لابتوب بطيء جداً -حتى بعد ويندوز ٨ لا زال بطيء- وتعتقد ان التابليتز ما تؤدي أعمال الانترنت اليومية لك، فأنصحك تشتريه وبشدة.

أخيراً، حبيت أشكر الشجعان عبدالله القرني وعبدالله المديفر على مساعدتهم الكبيرة لي بخبرتهم التقنية الواسعة.